ના હોય ચન્દ્રમાં આભમાં જ્યારે ગગન અંધાર દેખાય છે
સાચા અર્થે આ દીવડાની કીંમત જરૂરતમાં સમજાય છે

સાચો મળે સાથી સફર, કાંટા ભરી હસતાં કપાઈ જશે
વચમાં હશે જો પ્રેમ છોડી વૈભવ ઝુપડીમાં રહેવાય છે

માગ્યાં વિના આ સુરજમુખી જોઈ સુરજ બહુય મલકાય છે.
જો હોય હૈયે પ્રીત સાચી,કાયમી એ સબંધ સચવાય છે

મીંચો નયનને રોજ સપનામાં ઘણી હલચલ થઈ જાય છે
ભર નીંદરે યાદો બની જાળું બધે ચોતરફ ફેલાય છે

લખવા જરા બેસુ ગઝલ અને શબ્દ સાથે પ્રેમ ટંકાય છે
અંતરની ગાઢી પ્રીત હો તો મન ગુલાબી થઈને હરખાય છે.

વરસો વરસ વધતું રહે આ પ્રેમનું જે ઋણ કેમ ચુકવાય છે ?
દેજે પ્રભુ શક્તિ અમોને,પ્રેમથી જે જગને જીતાય છે.

-રેખા પટેલ(વિનોદિની)

ગાગાલગા-ગાગાલગા-ગાગાલગા-ગાગાલગા-ગાલગા