સાકી

સૌંદર્ય તો ખાલી આંખો વડે પીવાતો શરાબ છે સાકી
ઉતર્યા પછી એ નશો જણાશે નકરો આભાસ છે સાકી

પૂછો ભલા એ બાગ ને કે પાનખર માં શું હાથ આવે
મુરઝાતા ફૂલો અને ખરતા પત્તાનો આવાસ છે સાકી.

ઉગતો સુરજ અને જન્મ લેતી જીંદગી બેવ સરખા લાગે
સાંજે ગણગણે જી કાનમાં લાગે આખરી શ્વાસ છે સાકી

તમે પૂછો જઈ સુરદાસને કે પ્રીત કેમ ચડાવશે ચાકડે?
વિના આંખે પ્રેમને આપ્યો મઝાનો અજવાશ છે સાકી

છેલ્લો જામ ભરતી વેળા થોડું સ્મિત ભરજે સાકી
ખુશી હોય કે ગમ છલકે તારા સાથની આસ છે સાકી

શું ફર્ક પડે છે,કાનાને હાથમાં બંસી હોય કે સુદર્શન
હોઠે છલકાતી દેખાય રાઘા ને બંસીની પ્યાસ છે સાકી

-રેખા પટેલ ( વિનોદિની)