શરમ શરમ રમીએ.

નજર્યું પર પાંપણ કેરા  પડદાં દઇયે
આપણે શરમ શરમ રમીએ…. ચાલને શરમ શરમ રમીએ
ચહેરે લજ્જા કેરા ભાવ વહાવી
હૈયા મહી સહુ સાથ સજાવી …ચાલને શરમ શરમ રમીએ.

કાલ લગી ખળખળ વહેતું ઝરણું ધીમું પાડીએ
નદીના નિર્મળ નીર બનીને
પ્રીતિ કેરા પાન બનીને ….ચાલને શરમ શરમ રમીએ.

ભમરાનું ગુંજન સુણીને મર્મર હસી લઈએ
બહુ કનડે તો કાંટો દઈને
થોડા મહી ઘણું કહીને  …ચાલને શરમ શરમ રમીએ

હોય સાચ જો વાતમાં આંખ મહી ઝાંકી દઈને,
ભૂલ હોય તો નજર ઝુકાવી
તારું મારું બધું ભુલાવી …ચાલને શરમ શરમ રમીએ.

પકડા પકડી પાંચીકા ને આટાપાટા છોડી દઈને
પરણ્યા સાથે ઘરઘર રમતા
ઘાઘરી પોલકે ઓઢણી દેતા  ..ચાલને  શરમ શરમ રમીએ

 રેખા પટેલ ( વિનીદીની )