પ્રેમનું બંધન રક્ષાબંધન,

વ્હાલા ભાઈ જીગર ,

જો આપણો મનગમતો તહેવાર આવ્યો રક્ષાબંધન ,  હું તને બહુજ યાદ કરું છું , આજે પત્ર સાથે તારી માટે હાથે બનાવેલી રાખડી અને તારી રક્ષા માટે ખાસ ભગવાન પાસે  દિલ થી પ્રાર્થના પણ કરું છું , બહેન માટે ભાઈ પાસે હોય કે દુર તેની પ્રાર્થનામાં તે હંમેશા રહેતો હોય છે.

આજે તને આ પત્ર લખવાનું કારણ એજ છે કે હું ગઈ કાલે મારી મિત્રને મળવા ગઈ હતી ત્યાં એક ભાઈ બહેનના પ્રેમની અદભુત વાત સાંભળવા મળી જે જાણતા હું તને આ પત્ર લખતા મારી જાતને રોકી શકતી નથી કારણ છે તારું ફાસ્ટ ડ્રાઈવિંગ ..”ઉતાવળમાં થયેલી એક ભૂલને ભોગવવા આખો જન્મારો ઓછો પડે છે”

 વાત એમ બની હતી કે એક અમેરિકન યુવાન ભાઈ-બહેન મોડી રાત્રે પાર્ટીમાંથી ઘરે પાછા આવી રહ્યા હતા, બહેનની ના કરવા છતાં ભાઈ મેક વધારે પડતો દારુ પી ગયો હતો .  જેના કારણે બહાર થી ઓકે લાગતો તે ડ્રાઈવીંગ કરતા સ્ટેરીંગ વ્હીલ ઉપર કંટ્રોલ ગુમાવી બેઠો અને સ્પીડમાં આવતી ગાડી હાઈવેના રસ્તાની સાઈડે આવેલી લોખંડની રેલિંગને જોરથી અથડાઈ પડી,  જ્યાં મેકનાં પેટમાં સ્ટેરીંગ વ્હીલનો ભાગ ઘૂસી જતા તેની બંને કીડની ઉપર વધારે પડતી ઈજા થઇ આવી . જેનાં કારણે મેકની બંને કીડની નકામી થઇ ગઈ .  તેની બહેનને પણ થોડું વાગ્યું હતું પણ તેને માત્ર બહારી ઘા હોવાના કારણે થોડા સ્ટીચીઝ માત્ર આવ્યા હતા.

આ એકસીડન્ટ ને નજરે નિહાળનાર એક દંપતી એ તુરંત 911 કોલ કરી પોલીસ અને એમ્બ્યુલન્સ ને બોલાવી દીધી , તુરત મળેલી સારવારના કારણે મેકની જિંદગી બચાવી લેવાઈ છતાં પણ  મેકને લાંબો સમય હોસ્પીટલમાં રાખવામાં આવ્યો હતો તેને એક સ્વસ્થ કીડની વિના તેને લાંબો સમય બચાવવો મુશ્કેલ હતો.
“ઇન્ડીયા હોય કે અમેરિકા આ ભાઈ બહેનનો સબંધ હંમેશા સ્વાર્થથી ઉપર રહેલો હોય છે . આ લાગણીથી જોડાએલા સબંધની ખાસીયત દરેક જગ્યાએ એક સરખી જડી આવે છે ”
મેકની બહેને પોતાની કીડની સ્વેચ્છાએ ભાઈને આપી બંનેના લોહી એક છે તેની સાચી પરિભાષા બતાવી દીધી. અહી નાં કોઈ રાખડીની જરૂર હતી નાં કોઈ મેડલ ની બસ અહી સ્વાર્થ વિનાનો પ્રેમ અને સમર્પણ ભાવ માત્ર હતો..

જીગર, તું મારાથી નાનો હોવાના કારણે મને નાનપણ થી હંમેશા તારી બહુ ચિંતા રહી છે,  અને તેજ ભાવમાં આવીને તને કેટલીય વખત નાં ગમે તેવી રીતે ટોક્યો હશે પણ ભાઈ આ પાછળ બહેનનો માત્ર એકજ ભાવ રહેલો હોય કે ભાઈનું હમેશા ભલું થાય .  આજે પણ આજ ભાવના સાથે ટકોરું છું કે જીવન બહુ અમુલ્ય છે તેની યોગ્ય જાળવણી કરવી તે આપણા હાથમાં રહેલી હોય છે બાકીનું ઈશ્વર આપોઆપ સંભાળે છે.

ભાઈ, આતો અમેરિકા હતું જ્યાં યોગ્ય સમયે સારાવાર મળી જવાના કારણે આ ભાઈ બહેન આજે હસતાં જોવા મળ્યા છે  .  અમેરિકામાં જ્યારે પણ રસ્તામાં કોઈ નાનો મોટો અકસ્માત જોવા મળે કે ત્યાંથી પસાર થનારા તરત 911 કોલ કરી દેતા હોય છે , અને ગણતરીની ક્ષણોમાં તો એમ્બ્યુલન્સ સાથે પોલીસ કાર અને જરૂરીયાત પ્રમાણે ફાયરબ્રિગેડ પણ હાજર થઇ જાય છે . એકસીડન્ટ માં ઘાયલની સ્થિતિ જો ગંભીર જણાય તો ગણતરીની ક્ષણોમાં હેલીકોપ્ટર દ્વારા ઘાયલને હોસ્પિટલ પહોચાડી દેવાય છે .ભાઈ અહી અમેરિકાની પોલીસ વ્યવસ્થા અને એમ્બ્યુલન્સને કોઈ ના પહોચી શકે ,

 જોકે હવે આપણા દેશમાં પણ નંબર 108 ડાયલ કરતા ઝડપથી ઈમરજન્સી મદદ મળી જાય તેવી ગોઠવણ થઇ છે જેનો લાભ જનતાને મળતો થયો છે આ સારી વાત છે.

             ભાઈ, તને અહીના ટ્રાફિક વિષે જો ખ્યાલ આપું તો અમેરિકાની ટ્રાફિક વ્યવસ્થા બીજા દેશોની સરખામણીમાં બહુ વ્યવસ્થિત અને સુરુચિ પૂર્વકની હોય છે,અને એમ્બ્યુલન્સ વ્યવસ્થા તો ખાસ વખાણવા લાયક છે , થતા એકસીડન્ટ નિવારવા માટે અહી જગ્યા જગ્યા ઉપર પોલીસની કાર સ્પીડ મોનીટર વડે દરેકની કારની સ્પીડ જોતી હોય છે ,જરૂર કરતા વધારે ઝડપથી કોઈ કાર ચલાવે તો તરત તેની કાર રોકાવી તેની પાસે દંડ રૂપે રકમ વસુલ કરે છે સાથે સાથે સ્પીડ અને ગુનાના પ્રમાણમાં ટીકીટ આપે છે. અને આવી ત્રણ ટીકીટો મળે તો તેનું લાયસન્સ પણ અમુક સમય માટે રદ કરી દેવાય છે ……

વધારામાં અહી DUI  “ડ્રાઈવીંગ અંદર ધ ઇન્ફ્લ્યુએન્સ”  ની ટીકીટ મળે છે , એટલે કે કોઈ પણ જાતના નશા હેઠળ ડ્રાઈવિંગ કરનારને આ પ્રકારની ટીકીટ મળતી હોય છે . જેમાં તે વ્યક્તિને ભારે પોઈન્ટ મળે છે જેમાં તે તેનું લાયસન્સ પણ જપ્ત થઈ શકે છે . અહી કાર વિના દરેક ની હાલત અપંગ જેવી થઈ જાય છે માટે બધાજ આ બાબતે બહુ સાવચેતી રાખે છે  જેથી નકામા એકસીડન્ટ નિવારી શકાય છે .

પરતું મારી એક વાત યાદ રાખજે કે સમય એક એવી વસ્તુ છે જે હાથ માંથી નીકળી જાય પછી પાછી મળતી નથી માટે તેને સાચવીને ગણતરી થી વાપરવી જોઈએ , માત્ર ક્ષણોની ઉતાવળ જિંદગીની તમામ ક્ષણોને ઝુટવી શકે છે.”   માટે હવે તું હંમેશા રોડ ઉપર ડ્રાઈવિંગ કરતા તારી આ બહેનના શિખામણના બે શબ્દોને યાદ રાખજે, બસ આજ મારી તને રક્ષાબંધન છે .

લી. તારી બહેન નેહા નાં આશિષ

રેખા વિનોદ પટેલ
ડેલાવર .

 

હુજ મારી સાથે રહીશ:

હુજ મારી સાથે રહીશ:
મા બાપનું એકનું એક સંતાન શિવ ,
રોજ હમઉમ્ર બાળકોને તેમના ભાઈ બહેન સાથે રમતા જોઈ મુંઝાય ,
અને મા પાસે જઈને પૂછે ” મા મારે કોઈ ભાઈ કેમ નથી?”
મા કહે “મારે તું એકલો જ બસ છે “.
“નાં મા મારે ભાઈ જોઈએ ,મારી સાથે રમવા વાતો કરવા” બાળકની જીદ વધતી ચાલી।
માએ એક અરીસો હાથમાં પકડાવી દીધો ” લે બચ્ચા આમાં ભાઈ છે જો “.
” બરાબર તેના જેવોજ ભાઈ જોઈ શિવ ખુશ થઇ ગયો ,વાતો કરવા બેસી ગયો “.
” મા,આતો હું બોલું તેજ બોલે છે, હું કરું તેજ કરે છે , આમ કેમ?”.
“હા બેટા તું બહુ વ્હાલો છે તેને, માટેજ તે તારા જેવું કરે છે ” માએ સમજાવ્યો।
મોટો થતા તે સમજી ગયો આ તો અરીસો માત્ર છે એક આભાસ છે.
આજે સહુ કામ હોય ત્યારે આવતા અને કામ થઇ જતા દુર ચાલ્યા જતા,
જ્યારે પણ તે પેલા અરીસા સામે નજર કરતો તો એના જેવો શિવ ત્યાજ મળી આવતો.
તે આજે સમજી ગયો કે સહુ કોઈ છોડીને જશે, માત્ર હુજ મારી સાથે રહીશ.
રેખા પટેલ (વિનોદિની )

 

“જોયું જાણેલું આપણું “

પ્રિય શાલીની ,
તને યાદ કરતા મને મારું બચપણ યાદ આવી યાદ આવે છે મસ્તી ભર્યું આપણું સમર વેકેશન કારણ તું અને હું શહેરમાં ભણતા હતા અને ઉનાળાની રજાઓ પડતા ગામ આવી જતા કારણ હતું અહીના લીલાછમ ખેતરો અને ખળખળ વહેતી મહીસાગર નદીનો કિનારો,

સખી ,બાળકોને લઇ અમે આ સમરમાં કેલીફોર્નીયાના નેવાડા સ્ટેટમાં ગયા હતા. ત્યાંથી શરુ કરાએલી મારી જર્ની વીશે કેટલીક રસપ્રદ વાતો કહેવા માગું છું કારણ હું જાણું છું તને પણ મારી જેમ નેચર સાથે પ્રીત છે..

બાજુ બાજુમાં આવેલા સ્ટેટમાં સાવ અલગ અલગ રીતે કુદરતે પોતાના પાથરણાં પાથર્યા છે તું વાંચીને પણ અલગ અનુભૂતિ કરીશ તેવી આશા છે। શાલીની નેવાડા એટલે બહુ ચર્ચિત લાસવેગાસ કસીનો નું શહેર જ્યાં રાત ઢળતી જ નથી ,રાતમાં આ શહેર નવોઢા જેવું શોભે છે, છતાં પણ મને આ શહેરની કેટલીક વાતો અરુચીકારક અને દુઃખી કરે તેવી લાગી , અને તે છે અહી ડોલર કમાવવા માટે ની સ્ત્રીઓની મજબુરી . અહી દેહ વ્યાપાર ખુલ્લે આમ ચાલે છે ,બહાર હસતી દેખાતી રૂપાળી સ્ત્રીઓની અંદરની મજબુરી મને સ્પર્શી જાય છે , તો વળી ઠેરઠેર સુંદર 18-20 વર્ષની છોકરીઓ સાવ ટુંકા બે અંતઃવસ્ત્ર પહેરેલા રાખી આવેલા પ્રવાસીઓ સાથે પિક્ચર ખેચાવી બે બે ડોલર ભેગા કરતી જોવા મળે છે.

શાલીની બે દિવસ રોકાઈ અમે કુદરતના બીજા રૂપને માણવાં મેમોથલેક્સ જવા નીકળ્યા ત્યારે વચમાં સિયેરા માઉન્ટેન ની ઇસ્ટ સાઈડે આવેલ ડેથવેલી આવ્યું , આ ડેથ વેલી એટલે દરિયાની સપાટીથી 282 ફૂટ નીચે આવેલ આ વેલીમાં હાઈએસ્ટ ગરમી નોધાય છે . સુકા પથરાળ એરિયામાં સરેરાશ 120 ફેરાનહીટ નોઘાય છે. 2013 ના જુન મહિનામાં 129 એટલેકે 54 સેલ્સિયસ સુધી પહોચી હતી, અમને 250 માઈલના ડ્રાઈવ દરમિયાન માંડ 50 કાર રસ્તામાં જોવા મળી હતી , સાવ ઉજ્જડ લાગતા આ રસ્તામાં ગામ કે ગેસ સ્ટેશન પણ આવતા નહોતા ,વધારામાં ફોન થી ટેવાઈ ગયા હોઈયે છે તેવા સમયમાં અહી ફોન પણ રેન્જ બહાર આવી જાય, સખી આવા સમયમાં ભગવાન યાદ આવે કેમ ખરુંને ?

પણ સાચુજ છે કે “દુઃખ પછી સુખ આવે ત્યારે તેની મીઠાશ કંઈક અનેરી લાગે” બરાબર આવું જ થતું જ્યારે અમે મેમોથલેક્સ પહોચ્યા આહા શું કુદરતે મન મુકીને સુંદરતા વેરી છે ,અને ત્યાં દસ હજાર ફૂર ઊંચા પર્વતોની વચમાં નાના મોટા 20 લેક થી ઘેરાએલા આ સ્થળને જોયું અને તું યાદ આવી ગઈ..

આ જગ્યા બરાબર આપણા કુલુ મનાલીની સુંદરતાને યાદ કરાવે તેવી છે ,આપણો ભારત દેશમાં સૌદર્યમાં ક્યા કોઈના થી કમ છે કેમ ?

પણ સખી સાચું કહું અહી સુંદરતા સાથે સ્વચ્છતા નો સુમેળ છે જે કુદરતને વધારે નિખારે છે , ક્યાય ગંદકી જોવા મળતી નથી , અહી અમેરિકન કરતા યુરોપિયન પ્રજા વધારે આવે છે ,ગામની વસતી 10000 હશે પણ પ્રવાસીઓ ની અવરજવરના કારણે અહીની વસ્તી સરેરાશ 22 થી 25 હજારની થઇ જાય છે . અહી સમર કરતા વિન્ટર ની બ્યુટી અનોખી હોય છે માટે સ્કી અને સ્નો સર્ફિંગ માટે ભારે ધસારો રહેતો હોય છે.

અમે તો સમરમાં ગયા હતા, મને યોસેમીતે ના ઈસ્ટ એન્ટ્રેન્સ પાસે આવેલા મોનો લેક નું અનોખું સૌદર્ય આકર્ષી ગયું હતું ,આ લેકની ખાસિયત તને ટુકમાં કહું તો આનું પાણી દરિયાના પાણી કરતા પણ વધારે ખારું છે એક લીટર પાણીમાં સરેરાશ 70 ગ્રામ સોલ્ટ મળે છે। હવે આટલા ખરા માની સાથે હવાને કાર્બનડાયોક્સાઈડ નાં મિશ્રણને કારણે ફોર્મેડ થઈને ટુફા એટલેકે લાઈમ સ્ટોન રચાય છે જેના કારણે લેકના કિનારે અદ્ભુત દ્રશ્ય સર્જાયું છે. જે દુરથી જાણે બાળપણમાં કહેવાતી પરી કથાના હવા મહેલ જેવુજ દેખાય છે .
આનાથી સાવ ઉલટું બસ 15 માઈલ દુર આવેલા સ્પ્રિંગ હોટ ક્રિક નામની જગ્યા ઉપર આવેલી ક્રિક માંથી વહેતા પાણીનું ટેમ્પરેચર 200 ડીગ્રી જેટલું છે ,થોડે દુર ઉભા રહીને પણ ઉકળતા પાણીનો અવાજ સંભળાય છે આનું કારણ છે નીચે જમીનમાં થી પસાર થતી વોલ્કેનો ટ્યુબ। સખી જોને કુદરતને કેમ કરી સમજવી. અહી એકજ સ્થાને અલગ અલગ સુંદરતાના અજુબા વેર્યા છે .

સખી મિત્રો વિના બધું સુખ ફીકું લાગે છે , અહી મારી સાથે મારી એક પ્રિય સખી હતી જેથી આ જગ્યાનું મહત્વ વધી ગયું હતું , પણ સાચું કહું તો હું તને યાદ કરતી હતી તેથીજ પ્રેમ સાથે આંખે દેખ્યો અહેવાલ તને આ પત્ર સાથે મોકલું છું .

“મિત્રો અને કુદરતનો સાથ જીંદગીમાં નવો જોશ અને તાજગી ભરીઆપે છે ,કુદરત પણ અઢળક સંપતિ આપણી ખુશી માટે છુટ્ટે હાથે વેરતો જાય છે અને સાચા મિત્રો પણ આપણા ભલા માટે બંને હાથ ખુલ્લા રાખે છે”.
ચાલ સખી હવે રજા લઉં બસ આમજ તને અહીની માહિતી આપતી રહીશ

-રેખા વિનોદ પટેલ
યુએસે

 

रूह की प्रीत

आज सपनेमे उनसे फिर मुलाक़ात हुई
जो अधूरी थी वो गुफ्तगु बार बार हुई

बिना कहे वक्त भी कुछ देर ढहर गया
यादे पुरानी सब आज तार तार हुई

वो पूछते रहे हमें हाले बयान दिलका
बिन सावन बारिस भी धारदार हुई

दिलके घने अंधेरेमे दिये की बात चली
पाकर उसका साथ नींद जानदार हुई

रात या दिन?जाने कोन सा वक्त रहा,
उनके जाते ही खुशियाँ घर बहार हुई
-रेखा पटेल ( विनोदिनी )

 

શતરંજની બાજી રમી છે જાણવા તમને.

શતરંજની બાજી રમી છે જાણવા તમને.
પ્યાદાઓ દોડોવ્યા અમો એ પાડવા તમને.

ઘોડો અઢી પગલા ભરે હાથીની સીધી ચાલ,
દોડાવ્યું છે આ ઊંટ ત્રાંસું હારવા તમને.

આ માર્ગની અડચણને રોકું કાં ખસેડું છું,
ક્યારેક હું જાતે મરું છું માણવા તમને.

ચોપાટનાં ખાલી થતાં ખાના બધાં જોઇ,
માંંડ્યો ફરીથી દાવ મેં સંભાળવા તમને

આજે અમે સાચી સમજથી દાવ સૌ ખેલ્યા
મોકો નહી દઉ જીતને સત્કારવા તમને.

રાજાની સામે ચેક દેવા તો વજીર મૂક્યો,
બાજી ફરી બીછાવશું જીતાડવા તમને.
-રેખા પટેલ (વિનોદિની )

 

કવિતા : હું લાઈટનો થાંભલો

ઉંચો ટટ્ટાર હું હવામાં શોભતો
સહુથી અલગ માની આભમાં ઝૂલતો.

આ થોડા દિવસ બહુ સારું લાગ્યું
પછી એકલતામાં મન ભારી ભાસ્યું

શિયાળે તો સહુ ઘરમાં ભરાતા ,
તહી ઉનાળે ખુલ્લી હવા માણતાં.

ચોમાસે કોઈ નાં બહાર ભટકે ,
ત્યાં કોણ આવીને અહી અટકે?

હમણા થી બહુ સારું લાગે છે ,
રોજ રાત્રે કોઈ આવતું ભાસે છે.

નજર નીચી કરી જોવા બેઠો ,
મારા પ્રકાશે બાળક વાંચતો દીઠો.

એકલો બાળ આજ પોતાનો લાગ્યો.
થાંભલો બની જીવનનો રંગ રાખ્યો.
-રેખા પટેલ (વિનોદિની)

 

આઝાદીનું મીઠું સંભારણું

પૂજ્ય પટેલ સાહેબ , નમસ્કાર

આજે પણ તમને યાદ કરતા મનમાં અહોભાવ જાગી જાય છે.એનું કારણ એ છે કે તમારી દેશભક્તિની વાતો અને અમને આપેલા સંસ્કારો.એટલેજ આજે મનમાં રહેલી દેશ પ્રતિની જે ભાવના છે તે વિષે તમને લખીને જણાવવાની ઈચ્છા થઇ આવી છે.આ સાથે અહી અમેરિકમાં આ પ્રસંગ કેવી રીતે ઉજવાય છે તેનો ટુંકમાં ચિતાર આપવાની ઈચ્છા થઇ છે.

પંદરમી ઓગસ્ટના દિવસ એટલે આપણા દેશને મળેલી અમુલ્ય આઝાદીનાં અવસરને આખો દેશ ભારે દબદબાથી ઉજવે છે. પટેલ સાહેબ,તમોને જણાવુ કે  અહી પરદેશમાં રહેતા આપણા ભારતીયો આ અવસરને ઉજવવામાં ક્યાય પાછી પાની કરતા નથી.એમાં પણ જ્યારે દેશથી દુર વસતા હોઈએ ત્યારે દેશની યાદ વધારે તીવ્રતાથી આવતી હોય છે તેનું જીવંત ઉદાહરણ  છે પંદરમી ઓગસ્ટે ન્યુયોર્ક સહીત અમેરિકાનાં અન્ય મોટા મોટા શહેરોમાં ભારે ઉત્સાહથી યોજાતી પરેડ.

સાહેબ,આજે તમને હું ન્યુયોર્કમાં પંદરમી ઓગષ્ટનાં રોજ આયોજન આયોજીત થતી પરેડ વિશે જણાવવા માગું છું. ન્યુયોર્ક એટલે બરાબર જાણે વિશાળ સમુદાય ને સમાવતો દરિયો, જેમ દરિયામાં નાના મોટા અલગ અલગ જીવો એક થઇ રહેતા હોય છે તેમ અહીયાં  જાતજાતના દેશ વિદેશના લોકો એક જૂથ થઇ રહે છે. આથી આ શહેર સદા અલગ અલગ દેશની પ્રજાતીઓનાં ફેસ્ટીવલની મસ્તી થી ધબકતું હોય છે.

આ વખતે પંદરમી ઓગષ્ટની ઇન્ડિયા પરેડ શનિવારનાં બદલે સોળમી ઓગસ્ટ રવિવારનાં રોજ રાખવામાં આવી છે. કારણકે આ દિવસની રજા હોવાથી વધુ લોકો આ પરેડમાં ભાગ લઇ શકે.  મને  મળેલ માહિતી પ્રમાણે  હું તેના વિશે થોડું તમને જણાવું છું.

ન્યુયોર્કના પ્રખ્યાત મેડીસન એવન્યુ ઉપરથી  સોળમી તારીખ અને રવિવારે સવારે અગિયાર વાગ્યે આ પરેડની શરૂવાત થવાની છે. માહિતી પ્રમાણે આ વખતે  અલગ અલગ ચાલીસ જેટલા ફલોટસ (જૂથ )ભાગ લેવાના છે અને આજુ દરેક જુથનાં અલગ ટ્રેલર હોય છે.જેમાં તેઓ પોતપોતાની કંપની એસોસિયેશનનો પ્રચાર થાય એ રીતે એમનાં બેનરોથી  સજાવે છે. તેઓ આ પ્રોગ્રામ માટે ચેરીટી પણ કરતા હોય છે.

પહેલો ફ્લોટ AIA એટલેકે ફેડરેસન ઓફ ઇન્ડિયન એસોસિયેટનો રાખવામાં આવે છે. આ એસોસિયેટ એટલે કે ટ્રાઈ સ્ટેટના નાના નાના સમાજ ,જૂથ ને સમાવતું એક ઓર્ગેનાઇઝ થયેલું ગ્રુપ છે. જે આવી બધી એક્ટીવીટી માટે અમેરિકામાં જાણીતું છે.

આ ભારતીય પરેડને સ્પોન્સર કરવા માટે અમરિકાની કંપનીઓ ઉપરાંત ભારતની કંપનીઓ પણ છુટા હાથે ડોલર આપે છે.જેમ કે અમેરિકાની ટીવી એશિયા,એર ઇન્ડિયા, ગુજરાત ટાઈમ્સ સાથે ભારતનાં અદાણી ગ્રુપ જેવા પણ સાથ આપે છે.

સાહેબ તમે કહેતા હતા કે “જેમ મધ મેળવવા મધમાખીઓ એકત્ર કરવી પડે છે,એ જ રીતે કોઈ પણ પ્રસંગને દિપાવવા માણસોની હાજરી પણ હોવી જોઈએ. આ વાત તદ્દન સાચી છે. તેથી જ લોકોને આકર્ષવા માટે ફેમસ ફિલ્મસ્ટારથી માડી ખેલાડીઓને આમંત્રણ અપાય છે.સાભળ્યું છે કે આ વખતે પરીણીતી ચોપડા, અર્જુન રામપાલ, વીરેન્દ્ર સહેવાગ આવવાના છે. તેમને પણ આ સ્પોન્સરર સારી એવી રકમ આપતા હોય છે.

કદાચ આ વખતની પરેડમાં કેટલાક રેકોર્ડ તૂટશે તેવી સંભાવના છે. જેમ કે પરેડમાં ભાગ લેનારા માણસો જો વધુ સંખ્યામાં જોડાશે તો વલ્ડ રેકોર્ડ તૂટશે એવી સંભાવનાં છે.

આ વખતે છસ્સોથી વધારે હાથ ઉપર પીસ કે ફલાવરની ડીઝાઈનનાં મહેંદી ટેટુ ચીતરીને એક અલગ રેકોર્ડ બ્રેક કરવાની યોજના વિચારાઈ છે , આજકાલ આમ પણ ફેશન વલ્ડમાં આપણાં મહેંદી ટેટુની બહુ માંગ છે

 આ પરેડમાં ન્યુયોર્કના મેયરથી લઇને પોલીસ કમિશનર પણ જોડાય છે. હજારો પરેડમાં ભાગ લેનારા  વોકર્સની સાથે માર્ચિંગ બેન્ડ પણ પરેડની શોભા વધારે છે . પરેડનું મુખ્ય આકર્ષણ એટલે કે 23 મી સ્ટ્રીટ ઉપર થતો કલ્ચર પ્રોગ્રામ. જેની શરૂવાત આપણા રાષ્ટ્રગીત દ્વારા કરાય છે. ત્યાર બાદ ભારતના દરેક રાજ્યોના કલ્ચર પ્રોગ્રામ થતા હોય છે.

પરેડમાં ભાગ લેનારા બધાના હાથમાં ત્રિરંગો હોય છે. જેને લહેરાવતા બધા ભારત માતા કી જય બોલાવતા હોય છે. તેવા સમયે અભિમાન થઇ આવે કે આપણે ભારતીય છીએ.આ દ્રશ્ય જોઇને આંખોમાં ખુશીના આંસુ છલકાય જાય છે. આ પરેડ જોવી તે પણ એક લ્હાવો ગણાય છે

આ બધું જોતા એક  ક્ષણ એવું નથી લાગતું કે આપણે દેશથી હજારો માઈલ દુર વસીએ છીએ. કહેવાય છે ને કે આપણું આપણા થી દુર હોય ત્યારે તેની સાચી કિંમત સમજાય છે , બસ અહી પણ આવુજ કંઇક છે. દેશને પોતાની દિલમા સમાવીને આવેલા દેશવાસીઓની દેશ ભક્તિનું આ જીવંત ઉદાહરણ છે .  તમે હંમેશા પંદરમી ઓગસ્ટના ઘ્વજ વંદન પછી તમે જોરથી ઉચ્ચારતા તે શબ્દો આજે પણ કાનમાં ગુંજે છે,અને તમારી દેશ ભાવના સામે મારું મસ્તક ઝુકે છે  ” ભારતની આઝાદી અને શહીદો સદા અમર રહો “

 હું પણ માનું છું કે આખું વર્ષ ભલે ત્રિરંગાને સલામી નાં આપી હોય પણ આ એક દિવસ તેને સલામી આપી સર જમીનનું ઋણ અવશ્ય ઓછું કરવું જોઈએ”
આપને મારા પ્રણામ “જય હિંદ”

રેખા વિનોદ પટેલ (ડેલાવર )

 

“આપણે સ્વાર્થી થઇ ગયા છીએ”

વ્હાલા પપ્પા ,
અત્યારે અહી વેકેશન સમય છે તો જ્યારે પણ ક્યાંક બહાર જવાનું થાય તમે અચૂક તમારી યાદ આવી જાય છે.એનું કારણ છે તમારી મારા પ્રત્યેની ચિંતા અને લાગણી.

અમે જ્યારે પણ વેકેશનમાં બહાર જવાં તૈયારી કરતા હતાં ત્યારે તમે હંમેશા બહું જ ચોકસાઇ પૂર્વક સાથે લઇ જવાની સામગ્રીઓ વિશે પુછતા હતા.અમે સાથે શું શું લીધું તેની ચોકસાઈ પૂર્વક નોંધ લેતા.તમે યાદ કરાવી ફસ્ટએડ બોકસ સાથે મચ્છરને દુર ભગાડવા મળતી અગરબત્તી મુકાવતા.વ્હાલા પપ્પા તમારી આ કાળજી આજે પણ યાદ કરી હું મારા બાળકોને પણ આ રીતે જ સાચવું છું.

પરંતુ તમને આજે આ પત્ર લખવાનું ખાસ કારણ છે કે તાજેતરમાં અહી ડેલાવરમાં બનેલા એક પ્રસંગે મને હચમચાવી દીધી છે.અહી રહેતા એક મોટી કંપનીના સીઈઓ તેમની પત્ની અને બે તરૂણ વયનાં બાળકો સાથે સેન્ટજોન્સ નાં વર્જિન આઈ લેન્ડ ઉપર વેકેશન માટે ગયા.જે “કરેબિયન સી” માં આવેલો નાનો આઈલેન્ડ છે.આ ટાપું અમેરિકાની સતા હેઠળ આવેલો છે છતાં પણ અહી અત્યારની વસ્તી ગણતરી મૂજબ ૭૮ ટકા બ્લેક એટલે કે નીગ્રો લોકો,૧૦ ટકા જૅટલા વ્હાઈટ પીપલ રહે છે .  અને બાકીના ૧૨ ટકામાં બીજી અન્ય પ્રજાતીઓની વસ્તી  છે.આ આઈલેન્ડ વધારે કરી ટુરીસ્ટની અવર જવર ઉપર રહેતી હોય છે.

આ આઈલેન્ડમાં આવેલા એક સારામાં સારી વિલામાં આ ફેમીલી વેકેશન માટે રહેવા આવ્યું.અહી જીવ જંતુઓ ને મારવા માટે તેમના આવતા પહેલા જ ટર્મીનેક્સ પેસ્ટીસાઈડ મેથલ બ્રોમાઈડ નામની દવાનો છંટકાવ તેમની આ રહેવાની જગ્યામાં કરાયો હતો.જ્યારે આ પ્રકારની પેસ્ટીસાઈડ  ઉપર અહી અમેરિકામાં પ્રતિબંધ  છે.છતાં પણ અસરકારક દવા તરીકે આવી જગ્યાઓમાં ઓછા વત્તા અંશે લોકો ગેરકાદેસર આવી દવાઓનો ઉપયોગ કરતા હોય છે.

હવેની વાત પપ્પા તમને જણાવુ છુ, આ એક ભૂલની અસર આ મઝા કરવા ગયેલા ફેમિલીને બહુ ભારે પડી ગઈ.અહી સુદ્ધ વાતાવરણમાં રહેલા આ ફેમિલીને એમની વિલામાં ગયાને થોડો જ સમય વીત્યો હશે ને તરત પેલા બે બાળકોનાં પિતા સ્ટીવ એસ્મડ અચાનક બેભાન થઇને ઢળી પડયા અને તેમની પત્ની અને બંને બાળકોને આંચકી આવવા લાગી.

આ પરિવારનાં તમામ સભ્યોને તેમને હેલીકોપ્ટ દ્વારા નજીકની હોસ્પિટલમાં ખસેડાયા.ત્વરિત મળેલી સારવારના અકારણે તેમના જીવ તો બચાવી લેવાયા છતાં પણ આ જંતુનાશક દવાની અસરથી થયેલા નુકશાનમાંથી ઉગારી નાં શક્યાં.

પપ્પા વિચારીને પણ દુઃખ થઇ આવે તેવી ઘરના આ ફેમીલી સાથે એક ભૂલને કારણે બની ગઈ.કારણકે આ પેસ્ટીસાઈડ સહુ પ્રથમ સેન્ટર નવર્સ સીસ્ટમ અને આપણી બ્રીથીંગ સિસ્ટમને નુકશાન કરે છે.આજે લગભગ મહિનો થવા આવ્યો ત્યારે માંડ હવે મિસ્ટર સ્ટીવ એસ્મડ થોડા સામાન્ય થઇ શક્યા છે.તેમના પત્ની હજુ પણ હોસ્પિટલમાં છે અને વધારે અસર થયેલા બંને ટીનેજર બાળકો જેમાનો એક ૧૬ વર્ષનો છે તે કોમા માંથી હજુ  બહાર આવી શક્યો નથી અને નાનો દીકરો  જે ૧૪ વર્ષનો છે તે પેરેલિસિસની અસર હેઠળ હોસ્પીટલમાં સારવાર નીચે છે.

અહી સામાન્ય રીતે નુકશાન કર્તા પેસ્ટીસાઈડ દવાઓ ઉપર પ્રતિબંધ છે છતાં પણ આ રીતે ઉપયોગમાં લેવાતી દવાઓ કેટલી નુકશાનકારક છે તે આ એક ઉદાહરણ ઉપરથી સમજાઈ જાય છે.ઇન્ડીયામાં પણ આવા બનાવો બનવાનાં સમાચાર  અવારનવાર સાંભળવામાં અને વાંચવામાં આવે છે.

૧૯૯૦ની સાલની વાત છે.અહીનાં કનેટીકટના એક નર્સરી ફાર્મમાં આવી દવાઓ નાં ઉપયોગને કારણે ત્યાં કામ કરતા કેટલાંક વર્કર્સને ગંભીર રીતે નુકશાન થયું હતું.આમ અમેરિકા હોય કે ઇન્ડીયા હોય આવા બનાવો બનતાં જ હોય છે.પપ્પા તમને હજું પણ યાદ હશે ભોપાલ દુર્ધટના.હજું પણ આ ઘટનાઓની ભૂતાવળ આપણા દેશમાં જોવા મળે છે.

“પપ્પા હું તો એકજ વાત માનું છું જે આપણને હાનીકારક હોય તે બીજા માટે પણ હોય છે.માટે આપણા સ્વાર્થ માટે એવી કોઈ વસ્તુઓનો ઉપયોગ નાં કરવો જોઈએ જેથી આપણી સોસાયટીમાં આવી દુર્ઘટના થતી અટકાવી શકાય ”

જંતુનાશક દવાઓથી દુર રહેવું જોઈએ.આજ કાલ અનાજ અને  શાકભાજીના વધારે ઉત્પાદન માટે વાપરતા રાસાયણિક ખાતર સાથે પાકને રોગોથી બચાવવા માટે ઉપયોગમાં લેવાતી જંતુનાશક દવાઓ પાકમાં અંદર સુધી ફેલાઈ જાય છે અને ખોરાક વાટે આપણા શરીરમાં ફેલાય છે ધીરેધીરે તેમાં રહેલા ઝેરી તત્ત્વોની આપણા શરીર પર અવળી અસર થાય છે અને તેના કારણે આજ કાલ બહુ ઝડપથી સમાજમાં દેખાતા કેન્સર,અસ્થમાં,નર્વસ સીસ્ટમ ને ડીસ્ટર્બ કરતાં રોગો ફેલાય છે.
પપ્પા પહેલું સુખ તે જાતે નર્યા , તમારી તબિયતનું ઘ્યાન રાખજો ….. તમારી દીકરીના પ્રણામ

-રેખા વિનોદ પટેલ
ડેલાવર (યુએસએ)